Masarap pala ang chicken sandwich spread.

Mag aapat na araw na sa pridyider namin ang dalang pampalaman na ito ng kapatid ko. Di ako sigurado pero parang binigay sa kanya... tira noong nag birthday ang kasamahan nila sa trabaho sa clark ecozone. Sandamakmak ba namang manok ang binanlian, at siyempre kapares ang sandamakmak ding mayonnaise. Yun ang kwento ng kapatid ko. Pero minsan nag sisinungaling din iyan.

Di naman gawain ng kapatid ko, o sino man sa amin sa bahay ang mag uwi ng pagkain mula sa birthday, piyesta, o anumang okasyon na kelangan maghanda ng lomotyl, diatabs o anumang gamot panlaban sa diarrhea. Nasarapan siguro siya sa lasa.

Pagkatapos ng napakaiksing bakasyon, heto at namamalantsa na naman ako ng kulay luntian na uniporme, ang napagkasunduang kulay na isusuot sa trabaho tuwing lunes. ika-7 ng Hunyo bukas, aba at tingnan mo nga naman at kasabay pa ng pagbubukas namin ng klase ang pormal na pagtataas ng pamasahe. Limang piso na sa dyip ang dating apat at 72 na sa bus papuntang maynila, dati'y 60 lang. Kung ganito kabilis ang pagtaas ng mga bilihin at pamasahe sa pilipinas, katawa-tawa siguro ang sulatin kong ito kung babasahin ito sampung taon mula ngayon. Marahil ay singkwenta pesos na ang pamasahe sa dyip sa panahong yon, mula sa kanto namin hanggang sa palengke na dati'y nilalakad lang namin.
Gustuhin ko mang lakarin ang palengke ay di ko na magagawa. Maga ang aking mga paa dahil sa magkapares na sapatos na balat. Lagi kong sinasabi sa sarili, 'mabuti nang magain ang paa, 'wag lang magka alipunga.'

Dali dali kong huhubarin ang mga sapin ko sa paa pagdating ko ng bahay, at ay anong sarap! Anung presko ng pakiramdam na parang mga kaluluwang nahugasan ang kasalanan!

Gawi ko ang magbukas ng pridyider at sa pagkakataong ito, ang matabang bote na may mala-pandikit na laman ang aking nasumpungan. Teka, naka on na ba ang telebisyon?

Masarap pala ang chicken sandwich spread.


chokang79
June 6, 2004